Meänkieli
CSN on viranomhainen joka käsittelee Ruottin opintotukea, siis opintojen biitraakia ja lainoja. Met käsittelemä kans ajokorttilainoja ja kotikampheitten lainoja. Tässä saatat lukea lissää näistä eri lainoista. Meänkielinen tieto on ylheiselä tasola.
Sinun oikeus käyttää kansalisia vähemistökieliä
Jos kuulut johonki kansalishiin vähemisthöin sulla on oikeus käyttää sinun kieltä viranomhaisitten kontaktissa. Ruottin kansaliset vähemistöt on juutalaiset, romanit, saamelaiset, ruottinsuomalaiset ja tornionlaaksolaiset. Kansaliset vähemistökielet on jiddish, romani chib, saame, suomi ja meänkieli.
Lisätietoja oikeuksista käyttää kansalisia vähemistökieliä löytyy sivulta
Opintotuki – biitrakia ja lainoja opinthoin
On olemassa eri opintotukia riippuen mitä opiskelet ja kuinka vanhaa olet. Tässä on tavalisimat:
Oletko ulkomaan kansalainen?
Sulla, joka olet ulkomaan kansalainen, saattaa olla oikeus ruottalaisheen opintotukheen jos sie täytät vissit eelytykset. Jos sulla on vakituinen oleskelulupa (PUT) ja asut Ruottissa sulla on usseimiten oikeus ruottalaisheen opintotukheen.
Jos olet saanu Migrationsverketiltä aikarajotetun oleskeluluvan koska sulla on pakolaisasema eli sellainen, sulla on sillon usseimiten oikeus ruottalaisheen opintotukheen. Asyylihakijana sulla sen eestä ei ole oikeus siihen.
Lisäks on eri sääntöjä riippuen jos sie olet EU/EES eli Schweitzin kansalainen eli näitten maitten ulkopuolela.
Maksaa takashiin oppilaina
Sie joka olet opiskellu oppilainala CSN:istä alat makshaan takashiin velkaa ko sie otat pausin elikkä lopetat opiskelemisen oppirahoila. Se jällaa vaikka sie olet työtön, saat vanhuustenrahhaa elikkä siiryt ulkomaile. Täälä sie löyät informasuunia siittä kunka sie maksat takashiin ja mitä sie saatat tehhä jos sulla tullee olheen vaikea maksaa takashiin.
Kotikampheitten laina – sulle joka olet pakolainen (hemutrustningslån)
Sie joka olet osana kunnalisesta pakolaisvasthaanototsta saatat saa lainata rahhaa ette ostaa mööbeliä ja muuta kampetta sinun kothiin. Se saattaa olla sänkyjä, talterikkia, kattiloita ja toolia. Sie et saa käyttää rahoja esimerkiks ruokhaan, mubiilitelefoonhiin eli asunon hyyrhyyn. Kuinka paljon saat lainata riippuu siittä kuinka suuri sinun pere on, mitä jo on asunossa ja kuinka paljon rahhaa sulla jo on.
Rahat mitä lainaat sie häyt jälemin maksaa takashiin. Sie alat makshaan takashiin lainaa 2 vuotta jälkhiin kun sie sait ensi rahat.
Ajokorttilaina – sulle joka olet työtön (körkortslån)
Sie joka olet työtön saatat saa lainata rahhaa CSN:stä ette ottaa ruottalaisen ajokortin missä on ajokorttipätevyys B. Ajokortila saattaa olla helpompi saa työtä. Oikeus lainhaan on sillä joka on työtön ja on 18 ja 47 vuen välissä. Sie häyt kans täyttää vissiä vaatimuksia. Sie saatat lainata korkeinthaan 15 000 kruunua. Lainan sie häyt sitten maksaa takashiin, ja sen sie häyt tehhä vaikka et ole saanu eli ottanu ajokorttia.
Kontaktaa meitä
Kun otat yhteyttä sie saatat saa vastauksia ruottiks eli englantiks.
Updated: 2020-10-13
